"الصرع المستمر" Status Epilepticus - اضطراب كهربية المخ (الصرع)
استكمالا ل كلامنا عن اضطراب كهربية المخ "الصرع" .. هنتكلم النهاردة عن موضوع مهم جدا وهو الحالة الصرعية المعروف باسم “Status Epilepticus”
المعتاد ان نوبات اضطراب كهربية المخ سواء كانت نوبات كلية او جزئية عادة بتحصل في وقت قليل جدا وتختفي
وزي ما قلنا قبل كدة إن النوبة بتبدأ وتنتهي لوحدها من غير تدخل من حد ولا رش مية ولا بيرفيوم .... الخ ...
الحالة الصرعية بقى يعني اية
يعني استمرار نوبة التشنجات اكتر من 5 دقائق متواصلة
او نوبات متكررة اقل من 5 دقائق بشرط ان المريض لا يستعيد الوعي بين النوبات دي
الحالة الصرعية تصنف من ضمن حالات طوارئ المخ والأعصاب واللي بتستلزم التوجه للطوارئ للتدخل السريع
لإيقاف النوبة
والحفاظ على مجرى التنفس
ومتابعة العلامات الحيوية
وسحب التحاليل اللازمة
وعمل اشعة مقطعية عالمخ
و رسم مخ إن لزم الأمر
و الحجز في الرعاية المركزة لو استدعى الأمر
الحالة الصرعية تعتبر نادرة من حيث الحدوث ودا من نعمة ربنا ان مش كل مريض اضطراب كهربية مخ بيجيله الحالة الصرعية وعادة ما تصيب الاطفال وكبار السن
حوالي 25% من الحالات بيكون عندهم تاريخ مرضي بمرض اضطراب كهربية المخ
فتعالوا نقول اية اهم الأسباب اللي بتعرض المريض للإصابة بيها :
اسباب متعلقة ب أدوية اضطراب كهربية المخ:
زي لو جرعات غير كافية
ايقاف العلاج بشكل مفاجئ
بدأ استخدام أدوية جديدة ممكن تقلل فعالية أدوية اضطراب كهربية المخ
عدم فعالية العلاج المستخدم
جلطات ونزيف المخ
المخدرات والكحوليات
خلل في وظائف الجسم المختلفة زي الكلى والكبد وخصوصا لو بشكل مفاجئ
خلل في معدل السكر والصوديوم والكالسيوم والمغنيسيوم في الدم
الجفاف الشديد وخصوصا لو معاه عامل اخر
السهر الشديد وعدم النوم لفترات طويلة وخصوصا لو معاه عامل اخر
طيب أية انواعها
الحالة الصرعية "المصاحبة" بتشنجات ... ودا النوع والشكل الأشهر والاكثر
الحالة الصرعية "الغير مصاحبة" بتشنجات ... ودي بتكون نوبة اضطراب كهربية المخ من غير تشنجات وبيكون المريض فيها فاقد الوعي او غير كامل الوعي
طيب ازاي التعامل مع الحالة الصرعية
من حيث العموم في بداية النوبة بيكون التعامل زي ما قلنا قبل كدة في موضوع الاسعافات الأولية لمريض اضطراب كهربية المخ
راجع المنشور السابق ده الرابط:
https://fb.watch/kOf32vybcI/?mibextid=Nif5oz
... ولو وقت النوبة بدأ يطول وداخل ع ال 5 دقايق ... يرجى طلب الاسعاف فورا والتوجه لاقرب طوارئ .. لأن زي ما قلنا دي من حالات الطوارئ اللي ليها علاجات معينة وتحتاج التدخل بشكل سريع ومعظمها أدوية مخدرة ...
والتأخر في العلاج قد يكون ليه مضاعفات خطيرة لا قدر الله
ومتستناش تتصل بالدكتور او تبعت على واتساب ولا تستنى اي حد .. لأن رد أي حد هيكون توجه فورا للطوارئ ..
ربنا يحفظ جمبع مرضانا ويتم شفاءهم على خير
تابعوا مواضعينا السابقة لمعرفة تفاصيل أكتر عن اضطراب كهربية المخ والأنواع والأسباب والإسعافات الأولية ... ومتنساش شير وعرف غيرك
دكتور أسامة يعقوب محمد
استشاري ومدرس أمراض المخ والأعصاب
كلية طب قصر العيني - جامعة القاهرة
دكتوراة الأمراض العصبية - جامعة القاهرة
ماجستير الأمراض العصبية والنفسية - جامعة القاهرة
عضو الجمعية المصرية للأمراض العصبية والنفسية وجراحة الأعصاب
عيادة الدقي :
119 ش التحرير بجوار محطة مترو الدقي - الدور الخامس
عيادة أكتوبر :
المحور المركزي - بجوار مسجد الحصري - أبراج أكتوبر بلازا - الدور الأول
للمواعيد والحجز بالعيادات بالاتصال على :
01143006611
عفواً لا يوجد تعليقات في الوقت الحالي ، كن أول من يعلق على هذا الموضوع ... ↴
