رسم المخ - اضطراب كهربية المخ (الصرع)
استكمالا لموضوعنا اللي فات وهو ازاي نشخص اضطراب كهربية المخ وقلنا ان اهم حاجة سماع التاريخ المرضي مع بعض الأسئلة اللي بيسألها الطبيب بالتفصيل ويا ريت لو فيه فيديو مصور للحالة ودة بيبقى ادق في معرفة هل النوبة اضطراب كهربية المخ او لأ
وبعد كدة يجي دور الفحوصات زي تحاليل الدم و ممكن البول واشعة المخ اما مقطعية او رنين مغناطيسي
ايه رأيك تقرأ الموضوع اللي فات لو مكنتش شوفته
https://m.facebook.com/story.php?story_fbid=pfbid02BmZmPGD4VP4MqoR332TYxQpdgusSMAksXPBuiMaVVZvBKd5etb8TnamcFQKsAhX9l&id=100063904336689&mibextid=Nif5oz
طيب ايه بقى موضوع رسم المخ دة !!!
ايه هو رسم المخ
دا اجراء بسيط مش مؤلم عن طريق توصيل بعض الأسلاك بفروة الرأس بشكل معين وترتيب ونظام معين عشان تسجيل النشاط الكهربائي للمخ
واستخدامه الأساسي في اضطرابات كهربية المخ واضطرابات النوم
هل رسم المخ ضروري للتشخيص
أولا تشخيص اضطراب كهربية المخ تشخيص إكلينيكي ... يعني ايه؟
يعني عن طريق وصف الحالة من اللي شافها وبعض الأسئلة للمريض نفسه .. وتصوير الحالة فيديو ... دا اللي هو تشخيص الحالة نفسها انها اضطراب كهربية المخ ...
والفحوصات من حيث العموم تهدف ل معرفة الأسباب من عدمها .. وفي بعض الأحيان تشخيص بعض المتلازمات "هنبقى نتكلم عنها بعدين إن شاء الله "
و رسم المخ دا من الفحوصات ...
يبقى ممكن نشخص أن المريض عنده اضطراب كهربية المخ من غير ما نعمل رسم مخ أصلا .. لو كان التاريخ المرضي و وصف الحالة دقيق و كافي للتشخيص
امال ايه لازمة عمل رسم المخ
في بعض الحالات ممكن يساعد في التشخيص وخصوصا في بداية المرض و لو مفيش شاهد عيان شاف النوبة وقدر يوصفها كويس ولا فيه تصوير فيديو للنوبة
وعشان يحدد منشأ اضطراب كهربية المخ هو جزئي أو كلي "راجع موضوع أنواع اضطراب كهربية المخ" ...
وعشان تشخيص بعض المتلازمات اللي بيكون ليها شكل معين في رسم المخ ...
وفي بعض حالات النوبات المتكررة المختلف عليها في التشخيص هل هي اضطراب كهربية مخ أو لأ ...
وكمان بيستخدم قبل ما ناخد قرار إيقاف الأدوية بعد فترة معينة من العلاج
طيب هل لازم رسم المخ يظهر وجود اضطراب في كهربية المخ
لأ مش لازم ... بالعكس دا في حالات كتير جدا جدا رسم المخ بيكون طبيعي جدا وميظهرش حاجة ... ايوووة وخصوصا كل ما تكون مدة الرسم قليلة ... ودا لأن المريض بيعمل الرسم عادة في وقت هو فيه بين النوبات وطبيعي إن الرسم يكون طبيعي
وعشان كدة في كتير من الأحيان نطلب إن الرسم يكون مدة طويلة ويكون المريض مش نايم كويس ... عشان نحفز ظهور الاضطراب
لكن مش عشان رسم المخ طبيعي يبقى المريض معندوش المرض .. ودي نقطة مهمة جدا جدا جدا لازم نخلي بالنا منها
ورسم المخ ممكن يتعمل في وقت يظهر الكهرباء وفي وقت تاني يطلع طبيعي ودا شيء عادي جدا عشان كدة مش بنعتمد عليه بشكل أساسي في التشخيص زي ما قلنا
والغريب كمان إن رسم المخ ممكن يبين تغييرات اضطراب كهربية في غير مرضى اضطراب الكهربية ... زي الصداع النصفي مثلا !!
طيب خلاص شخصنا وبدينا علاج .. هل لازم نعمل رسم المخ كل شوية
لا مش لازم خالص ... بيتعمل في حالات قليلة جدا ... أهمها:
اما نفكر نقلل العلاج بعد فترة من استقرار الحالة وبنعمله فترة طويلة شوية عشان نزود فرصة ظهور الاضطراب من عدمه...
وكمان لو لاقدر الله المريض جاتله نوبة شديدة أدت الى دخوله المستشفى فبنعمل رسم المخ للتشخيص والمتابعة...
وكمان عند وجود نوبات متكررة بالرغم من أخذ العلاج المناسب بإنتظام ... ودا عشان نعرف أصلا لتكون مش نوبة حقيقية
"أية دة هو فيه نوبة حقيقية ونوبة مش حقيقيقة؟ ايوة ودا موضوع لوحده إن شاء الله"
طيب يتعمل فين رسم المخ
رسم المخ من الفحوصات اللي بتعتمد بشكل كبير جدا على عوامل كتير ... وأي خلل في أي عامل منهم يخلي النتيجة مش دقيقة ... عوامل زي:
توصيل الأسلاك
وإعدادت الجهاز
والبيئة المحيطة بالمريض
والفني المسؤول
واخر حاجة كتابة التقرير من طبيب متخصص وثقة في المجال
رسم المخ والعمليات الجراحية لمرضى اضطراب كهربية المخ
في بعض الحالات التي لا تستجيب للعلاج الدوائي بيبقى فيه حلول أخرى زي العمليات الجراحية ... وهنا دور رسم المخ بيبقى كبير ومهم جدا جدا جدا ...
وإن شاء الله نبقى نتكلم عن الموضوع دة بردو بعدين "العلاجات الغير دوائية لمرضى اضطراب كهربية المخ"
الخلاصة :
ممكن مريض اضطراب كهربية المخ ورسم المخ طبيعي والإشعات طبيعية مش مبينة حاجة...
مش لازم نعمل كل شوية رسم مخ ... ومفيش حاجة اسمها متابعة بنسبة الكهرباء في المخ...
مفيش حاجة اسمها الرسم بقى طبيعي ف خلاص نوقف العلاج...
في كتير من الأحيان رسم المخ بياخد أكتر من حجمه ...
تابعونا دايما
ومتنساش .. شير وعرف غيرك
دكتور أسامة يعقوب محمد
استشاري ومدرس أمراض المخ والأعصاب
كلية طب قصر العيني - جامعة القاهرة
دكتوراة الأمراض العصبية - جامعة القاهرة
ماجستير الأمراض العصبية والنفسية - جامعة القاهرة
عضو الجمعية المصرية للأمراض العصبية والنفسية وجراحة الأعصاب
عيادة الدقي :
119 ش التحرير بجوار محطة مترو الدقي - الدور الخامس
عيادة أكتوبر :
المحور المركزي - بجوار مسجد الحصري - أبراج أكتوبر بلازا - الدور الأول
للمواعيد والحجز بالعيادات بالاتصال على : 01143006611
دكتور / أسامة يعقوب
عفواً لا يوجد تعليقات في الوقت الحالي ، كن أول من يعلق على هذا الموضوع ... ↴
