تشخيص اضطراب كهربية المخ - اضطراب كهربية المخ (الصرع)
موضوع النهاردة مهم جدا جدا
وفيه معلومات ممكن تبقى جديدة على ناس كتير
بعد ما اتكلمنا كتير عن اضطراب كهربية المخ من ناحية الأنواع والأسباب والإسعافات .... الخ
( ويا ريت لو حضرتك مشفتش المواضيع دي تشوفها و إن شاء الله تستفيد منها)
إزاي بقى بيتم تشخيص اضطراب كهربية المخ (او الاسم القديم "الصرع")
و إزاي نعرف ان التشنج دة نتيجة اضطراب كهربية المخ أو نتيجة حاجة تانية ...
أية دة هو فيه أسباب تانية للتشنجات
طبعاً .. مش كل تشنج يبقى اضطراب كهربية مخ وهنتكلم عنه في موضوع تاني إن شاء الله .. متنساش تتابعنا كويس
لو سألنا السؤال دة ل ناس كتير .. (إزاي يتم تشخيص اضطراب كهربية المخ؟)
معظم الناس هتقول .. بألاشعة المقطعية أو الرنين المغناطيسي أو رسم المخ ..... الخ
لكن واقع الأمر مش كدة ... !!!
التشخيص السليم بيعتمد بشكل أساسي على التاريخ المرضي والسماع الدقيق للأعراض اللي بتحصل للمريض بالتفصيل ..
وبعد انتشار كاميرات الموبايل بشكل كبير فبقى تصوير الحالة فيديو حاجة مهمة جدا بتفيد الدكتور وتساعد على التشخيص وتوفر وقت ومجهود كبير ...
((عشان كدة متستسغربش لو الطبيب المعالج طلب من حضرتك الطلب ده .. لأنة كدة فعلا حريص على إفادة المريض والتشخيص الصحيح وزي ما قلنا في الموضوع اللي فات .. النوبة بتبدأ وتنتهي لوحدها ومحدش بيوقفها ... فتعمل الإسعافات الأولية وتصور فيديو .. ولو الموضوع بيحصل بشكل سريع ومش محتاج إسعافات بشكل معين .. يبقى صور فيديو علطول ))
وتاني حاجة بعد التاريخ المرضي أو تصوير الفيديو .. يجي دور الفحص الطبي للمريض
وبعدين يتم عمل الفحوصات بقى .. اللي منها تحاليل الدم وممكن البول وممكن السموم كمان و دي عشان استبعاد الأسباب اللي ممكن تكون عملت النوبة ... زي ما قلنا في موضوع الأسباب قبل كدة ((أية رأيك تشوفه عشان تعرفها )) .. والفحوصات دي خصوصا لو النوبة أول مرة
وبعد كدة يتم عمل اشعة المخ ...
طبعا الأسرع والأسهل والمتوفر أكتر هيا الأشعة المقطعية ... عشان إستبعاد النزيف و الأسباب الكبيرة اللي ممكن تصيب المخ ...
وبعدين يتم عمل الرنين المغناطيسي وبردو بهدف إستبعاد الإصابات اللي ممكن تصيب المخ بس بشكل أدق من المقطعية ..
بس خلي بالك من حاجتين ...
أولا : إن دقة جهاز الرنين تبقى كويسة....أقل دقة معترف بيها 1.5 تسلا ((تسلا: هي وحدة قياس المجال المغناطيسي))
ثانيا : عمل الرنين ب بروتوكول اضطراب كهربية المخ عشان يبين أجزاء معينة مش بتبان كويس في الرنين الروتيني
أما بقى رسم المخ .. زي ما هو بيفيد في مساعدة تشخيص حالات كتير ... فهو من أكتر الفحوصات اللي يُساء استخدامها وبيتبني عليها قرارت كتيرة وللأسف ممكن تكون مش دقيقة ..
ودا هنتكلم عنه بالتفصيل في موضوع لوحده إن شاء الله ... لازم تتابعونا
وفقنا الله وإياكم لكل خير
متنساش تشوف المواضيع اللي فاتت وشير وعرف غيرك
دكتور أسامة يعقوب محمد
استشاري ومدرس أمراض المخ والأعصاب
كلية طب قصر العيني - جامعة القاهرة
دكتوراة الأمراض العصبية - جامعة القاهرة
ماجستير الأمراض العصبية والنفسية - جامعة القاهرة
عضو الجمعية المصرية للأمراض العصبية والنفسية وجراحة الأعصاب
عيادة الدقي :
119 ش التحرير بجوار محطة مترو الدقي - الدور الخامس
عيادة أكتوبر :
المحور المركزي - بجوار مسجد الحصري - أبراج أكتوبر بلازا - الدور الأول
للمواعيد والحجز بالعيادات بالاتصال على : 01143006611
عفواً لا يوجد تعليقات في الوقت الحالي ، كن أول من يعلق على هذا الموضوع ... ↴
